سكوت بنصور

حبة سكوت للنبي
ياخونا بنصور
حبة سكوت والنبي
مش حلو ده المنظر
البيضة والا الفرخة
والإسم بنطور
*
مكنش عشمنا فيوم
إن الكلام يكتر
وإن العزيمة تهون
وإن الهدف يصغر
*
عايزين شوية عمل
ونبني ونعمر
عشان نرجع أمل
إن البلد تطهر
وكفاية طق الحنك
في الشكل والمظهر
*
كان فيه زمان دعوة
كانت زمان أطهر
ولا حد له دعوة
كرسي مين أكبر
كانت زمان لله
سيبوها له تظهر
واللي يكون لله
مين عليه يقدر
*
الله غايتنا
ليه تكون أصغر
ورسولنا قدوتنا
عيب يكون عنتر
دستورنا قرآنا
ليه الخلاف يكبر
عايزين نموت شهدا
والا إحنا بنهزر

أنا الإرهابي

هو اللي مات على أرضه***وهو بيصون عرضه***
يبقى إرهابي؟!
واللا صاروخ الغضب***هو اللي كان السبب***
في قتل أصحابي؟!
واللا اللي قال ياسلام***وخان بلده ونام***
هو ده العادي؟!
جايبيين زعيم قرطاس***يسمع كلام الناس***
بالذل ويطاطي
حتى الغريب بكانا***وسمع لشكوانا***
وهو مش راضي
ساكت ع الاحتلال***وعن قتل العيال***
ويقول وانا مالي
والاستيطان شغال***وهو عال العال***
ويقول كلام فاضي
غيران من العزة***ومن ولاد غزة***
ودمهم حامي
هو يقول ياسلام***واحنا نقول إسلام***
وربنا الهادي
رايحين على الأقصى***ولا عمرنا ننسى***
إن الجهاد غالي
شهدا وبنضحي***ودمنا يصحي***
مجدنا الخالي
لو كان البلد محتل***يبقى الميزان مختل***
لو هعيش راضي
يبقى صوت البارود***لابد إنا نعود***
منصورة يابلادي
هرمي صاروخ غزة***بالحق والعزة***
وسموني إرهابي
أنا بقول ياناس***أنا تبت خلاص***
وهبقى إرهابي
لما الشريف ينهان***ولا فيه حقوق إنسان***
يبقى اسمي إرهابي
بقول أنا إرهابي***وأبويا إرهابي***وابني كمان إرهابي

الزعيم

نظر

ثم زفر

ثم سد المعبر

ثم غضب وكشر

ثم بصق وتفل

قال إن هذا إلا فعل حماس

هم الذين قذفوا الحجر

سألوه عن ذنب طفل في عمر الزهر

بين أحضان أمه انفجر

فزجر ونهر

ثم زأر

أنشأ مؤتمر

وعلى التفاز رأوه عريان

لم يكن هناك ما يخدش البصر

فم وإليتان

قيل له استتر

غطى على الفور فمه

ثم بال فوق الجميع

وأنهى المؤتمر

ذاع الخبر

رهائن مخطوفة

جمع السادة المخبرين

مباحثات ونظر

قتل المخبرين

ثم انتحر

وكان قد أوصى بقتل الرهائن

ثم خرج من بين الأجداث منتصر

وبأقل الخسائر

خرج يدوس فوق أنين الضمائر

خرج يكمم كل الحناجر

ثم حشر له كل شاعر

قصيدة موحدة

منذ بدء البشر

بدم الشعوب

نفدي كل من فجر

وسنزيده إن كفر

الحكاية حكاية شعب ..........منتحر.........

.....تنبيه هام.....

هذه آخر رسالة كتبت بواسطة الشعب المنتحر منذ ما يقرب من ربع قرن ونعتذر عن أي تشابه في الأسماء والمواقف وهو من باب توارد الخواطر وهي صدفة غير مقصودة..............

إعتراف
أعترف بأني أنا الشعب المنتحر * وإني مت فحب والينا وابنه المنتظر

*****

أخدت فوشي وقلت أهاجر.... أصل والينا يطول عمره

باع الأرض وجاب م الآخر.... ومشغلنا فيها لأمره

قلت خلاص مش راجع تاني وبكرة الوالي كمان ينساني

*وإن هروبي عمل إنساني*

أنا يااخونَا شعب أصيل.... بفدي الوالي بروحي ودمي

وأدي حكايتي بدون تفصيل.... يمكن حد يخفف همي

*******

الست بكيزة كانت قاعدة.... ويا جوزها جناب الوالي

قالت له ياخويا يطول عمرك.... شوف شغلانة لإبني الغالي

قال مالواد دلوقتي أمين الشلة... .وبعد شوية هيجي مكاني

قالت له يابيبي سلامة عقلك.... أنا كان قصدي إبني الثاني

لما أخوه راح يبقى الوالي.... هوه ياحسرة هيمسك إيه

شوف له ولايه فأيها مطرح.... ياختي اسم الله ده إبني نبيه

قال ماهو طالع واكل نازل واكل.... وبيتربى فعز أبوه

فين هيلاقي غير دي تكية.... وأهو تجارنا كمان شاركوه

هو بيسحب ع المكشوف.... وهم يبوسوا رجل أبوه

بقى ياولية ده يبقى شريك.... يعني شاركهم من مصروفه

وقال بتقول مستقبل إبني.... بكرة يشارك في هرم خوفو

قالت له ياخويا ده إبنك برده.... والا نباهته دي طالعة لمين

والا رصيدك في بنوك بره.... والا العز ده جايبه منين

قال يابكيزة بطلي قر.... الناس لو فهمت تبقى حكاية

قالت له ياروحي فضها سيرة.... مانت عملت الناس مشاية

قال خلينا في المحروس.... أنا من بكرة هشوف له ولاية

*****

جاب الشلة وسأل عني.... قالوا له شعبك في الخليج

جمع العسكر واستدعاني.... وخطب خطبة كده تهريج

وقعد يشكيلي ضيق الحال.... وإنه عايش هنا متبهدل

وقال لي أشوف له فيزا لإبنه.... يمكن حاله هناك يتعدِل

أيها شغلة إنشالله أمير.... أهو يتشعبط كده في الأول

هربت بسرعة ورميت نفسي.... من فوق سور الباب العالي

وأنا بتدحرج شفت الشلة.... تحت بتهتف لابن الوالي

من أجل أن يعش الموت

لا تعجبن إذا نظرت

إلي تابوتي موشحا بالعلم المهيب

بالأمس جلست مثلك متعجب

اواليوم عجبت من عجبي فما العجيب

جئنا لنحصد أرواح البرية

في طول البلاد وعرضها باسم الصليب

جئنا بمكرمة المنايا للمستضعفين

فكان حقا على أرواحنا أن تستجيب

إستنساخ

يارُب سائل عاد وقد أعياه السؤالُ عن عزة كانت للعُرب مضرب الأمثالِ

.

كانوا كراما يرتجى فضل صحبتهم *من المستجيرين في حل وفي ترحالِ

.

سادوا الأنام إذ الجبار سيدهم *فدكوا بنور الهدى حصون ضلالِ

.

وملكوا القلوب إذ المختار قدوتهم* صلى الإله على صحب وعلى آلِ

.

خشعت قلاع العدى إن حل ذكرهم* وخشعوا لذكر الله بالغدو والآصالِ

.

كم خطب الوداد ملوك الأعاجم عندهم*ونقلوا العلوم فسبحان مغير الأحوالِ

.

فاليوم لا ترى بين الغثاء إذا ترى* إلا احتلالا أو سفراءا للإحتلالِ

.

لكنها سنة الأكوان لا مبدل لها فكم شمس أشرقت ثم آلت إلي زوالِ

.

فلا تحسبن حديثي حسرة وتندما* ولا يُرتجَى منه بكاء على الأطلالِ

.

لكنها ذكرى لمن لازال يعتبر *واستنساخ نطفة من صلب أبطالِ

.

فإنا هزمنا يوم الهزيمة على جبن *لا والله لمن نهزم على فقر وإقلالِ

.

هزمنا بسيف غدر كانت سيفا لنا *فتبدلت وتبدل الرجال شبه رجالِ

.

لكن الكرامة شيمة العُرب لا زالت *والعز حال بني المروءة لا الإذلالِ

.

فيارُب شرف عاد بعد طول مذلة* ويارُب حال بدلها الله غير حالِ

بحبك يا مجرم

.بحبك يا مجرم.

بحبك أكتر من ضنايا وبابايا

و أكتر كمان من نانسي عجرم

بحبك وحبك بيجري فدمي والمخبر بيجري ورايا

بحبك لما الضرايب بتاخد هدومي وتخطف عشايا

بحبك لما قعر جزمة سعادتك داس فوق قفايا

بحبك وانت بتفتح كشك قديم وتقص الشريط

و أشوف إنجازاتك وابارك واهنُي وأعمل عبيط

و اشكر حضورك واهتف بروحك وابني يردد معايا

بحبك يا مجرم

بحبك ولو ماشفتش إنجازاتك بلعن عمايا

بحبك أكتر من اللي كان إسمه زمان رغيف العيش

بحبك وانت بتشتغلني وتقول حليناها ونروح مانلاقيش

بحبك ولو هغمس بحبك ومش هلاقي غموس

بحبك واستغطى بحبك وأبقى اكمل بخيش

بحبك يا مجرم

بحبك وأسمع خطابك وتاكل بعقلي الحلاوة

بحبك ومراتي تزغرد لما تسمع كلمة علاوة

بحبك حتى لو هروُح مديون وجيبي فاضي

بحبك ولما الأسعار تزيد تاني بحبك غباوة

بحبك يا مجرم

بحبك وحبك دبانه واقفة على المناخير

لا قادر يوم أهشها ولا هيه ناوية تطير

بحبك وأهوهو باسمك من أكل لحم الكلاب

بحبك ولو مش لاقي قمح هاكل شعير

بحبك يا مجرم

بحبك كل طلة شمس والباشا واخد عيل م العيال

حتى يوم ماصطاد الواد الصغير وضرب عينه الشمال

من حبي قلت وماله برده خلي الباشا يتمرن

حتى الطبيب الشرعي من حبه كتب السبب إسهال

بحبك يا مجرم

بحبك و هبني البيت بحبك بدل الحديد

بحبك وأموت ف عز حبك و أصبح شهيد

بحبك وانت تبيع المصانع بفردة شراب

ولما تبيع أرض سينا برده هحبك أكيد

بحبك يا مجرم

بحبك وانت سارق من أبويا فلوس المعاش

ومش غلطة سعادتك دي غلطة أبويا إنه عاش

فيها إيه لو كان زار وخفف وريح جنابك

وكفاية إن الحكومة سايبه الميه ببلاش

بحبك يا مجرم

بحبك وأوأوأ باسمك من يوم ميلادي

تزود محافظة تنقص محافظة إيه يعني عادي

سياسة حكيمة تحط وتشيل

إيه يعني طنطا تروح بورسعيد

والا المحلة تروح المعادي

بحبك يا مجرم

بحبك ولو ماشفتش إنجازاتك بلعن عمايا

ورحمة بلدنا بحبك أصلي ماعرفش غيرك

وأتمنى إن البيه الصغير يمشي فخط سيرك

هو يمشي واحنا نسيب البلد ونمشي

يمكن لو لقيت نفسك لوحدك يصحى ضميرك

بحبك يا مجرم

بحبك وابيع نص عمري بس تغيب عن سمايا