.بحبك يا مجرم.
بحبك أكتر من ضنايا وبابايا
و أكتر كمان من نانسي عجرم
بحبك وحبك بيجري فدمي والمخبر بيجري ورايا
بحبك لما الضرايب بتاخد هدومي وتخطف عشايا
بحبك لما قعر جزمة سعادتك داس فوق قفايا
بحبك وانت بتفتح كشك قديم وتقص الشريط
و أشوف إنجازاتك وابارك واهنُي وأعمل عبيط
و اشكر حضورك واهتف بروحك وابني يردد معايا
بحبك يا مجرم
بحبك ولو ماشفتش إنجازاتك بلعن عمايا
بحبك أكتر من اللي كان إسمه زمان رغيف العيش
بحبك وانت بتشتغلني وتقول حليناها ونروح مانلاقيش
بحبك ولو هغمس بحبك ومش هلاقي غموس
بحبك واستغطى بحبك وأبقى اكمل بخيش
بحبك يا مجرم
بحبك وأسمع خطابك وتاكل بعقلي الحلاوة
بحبك ومراتي تزغرد لما تسمع كلمة علاوة
بحبك حتى لو هروُح مديون وجيبي فاضي
بحبك ولما الأسعار تزيد تاني بحبك غباوة
بحبك يا مجرم
بحبك وحبك دبانه واقفة على المناخير
لا قادر يوم أهشها ولا هيه ناوية تطير
بحبك وأهوهو باسمك من أكل لحم الكلاب
بحبك ولو مش لاقي قمح هاكل شعير
بحبك يا مجرم
بحبك كل طلة شمس والباشا واخد عيل م العيال
حتى يوم ماصطاد الواد الصغير وضرب عينه الشمال
من حبي قلت وماله برده خلي الباشا يتمرن
حتى الطبيب الشرعي من حبه كتب السبب إسهال
بحبك يا مجرم
بحبك و هبني البيت بحبك بدل الحديد
بحبك وأموت ف عز حبك و أصبح شهيد
بحبك وانت تبيع المصانع بفردة شراب
ولما تبيع أرض سينا برده هحبك أكيد
بحبك يا مجرم
بحبك وانت سارق من أبويا فلوس المعاش
ومش غلطة سعادتك دي غلطة أبويا إنه عاش
فيها إيه لو كان زار وخفف وريح جنابك
وكفاية إن الحكومة سايبه الميه ببلاش
بحبك يا مجرم
بحبك وأوأوأ باسمك من يوم ميلادي
تزود محافظة تنقص محافظة إيه يعني عادي
سياسة حكيمة تحط وتشيل
إيه يعني طنطا تروح بورسعيد
والا المحلة تروح المعادي
بحبك يا مجرم
بحبك ولو ماشفتش إنجازاتك بلعن عمايا
ورحمة بلدنا بحبك أصلي ماعرفش غيرك
وأتمنى إن البيه الصغير يمشي فخط سيرك
هو يمشي واحنا نسيب البلد ونمشي
يمكن لو لقيت نفسك لوحدك يصحى ضميرك
بحبك يا مجرم
بحبك وابيع نص عمري بس تغيب عن سمايا
هناك 3 تعليقات:
يمكن حد تاني يضحك عالنص..بس والله جت عالجرح(قصدي الجروح)..
مفيش حد مرتاح وأسباب عدم سعادتنا همّ همّ نفسُهم ..قاعدين لنا من قرون..
عمري ما صدقت ان الحامي ممكن يكون حرامي برضو الا لما شربونا المر مليون مره..
بلدي و بلدك كلو سيان عندهم..
بس بالله فهّمني ..الجمهور(الشعب) ذنبه ايه لما بيورثوا كل حاجه الاّ حقهم ؟!
وحقهم بيتورّث..باسم المصلحه العامه..
هي العامه عايشه عشان تبقالها مصالح؟!
ربّنا كان ولا يزال عالظالم
والله منورة وكلامك منور صفحتي ويارب دايما.............
على فكرة العمة عايشة....
إرسال تعليق