.عفوا صلاح الدين....ربما يكون ميتا.
سؤال محير دماغي ومخلي قلبي حزين
إزاي يبات الأقصى أسير والمسلمين ساكتين
والقدس محتلة وأهلها مستنيين صلاح الدين
و صلاح مات واندفن و ما كانش م الخالدين
والحفر شغال تحت المقدسات والقتل والتوطين
لا صلاح خرج من تربته ولا حتى اليهود خايفين
سألت عساكر الداخلية جيشنا العربي فين
واحد معرفش العرب والتاني معرفش الجيش
والتالت كان نبيه أوي ومفهمش كلمة فين
شديت اللحاف فوق دماغي وقلت أنام سنتين
جاني هاتف في المنام بيسأل عن جيوش حطين
وقال لي صلاح راجع بس اليهود مش عارفين
إنزل ولم الشباب ومتقولش فين رايحين
نزلت أصلي الفجر لقيت الشباب نايمين
وسألت ف صلاة الضهر قالوا لي مش فاضيين
خرجت أدور على القهوة لقيتهم هناك قاعديين
ناس بتلعب على المشاريب والباقي متراهنيين
واللي بيطلع على النسوان ويقول ياحلو نظرة عين
صرخت وقلت صلاح راجع قوموا حرروا فلسطين
ضاع صوتي مع الزحمة ومين اللي يسمع مين
والهايفا محتارة على الراديو الواوا تبوسها منين
لقيت واحد سارح ف ملكوت ربه شكله حزين
قلت زاهد ف دنيا القهاوي أو حتى عالم دين
قلت له فلسطين والأقصى والأسرى واللاجئين
هم وقام وانتفض وقال تمام يابيه جاهزين
وبسرعة جمع شلته التوت واللول والأنتيخ
قال لهم خناقة ميري والبيه عايزنا يومين
وكل واحد يجيب صاحبته والبانجو وسجارتين
ويجيب معاه مطوته ويمكن نبات كمان ليلتين
وسأل عن المعلم صلاح هو اللي موت أبو دومه؟
وبإيده قطع جتته وقسمها ف شكارتين
احترت أرد ازاي والا أهرب أروح على مين؟
قلت هو اللي شرٌح قلب الأسد والناس شاهدين
وطرد عصابة فرنسا وبريطانيا م القدس برصاصتين
وخرجت ألحق صلاح قبل ما يصحوه من نومه
أقول له خليك هناك عايش شبابنا مش عايشين
مش عايزين الشباب يفسد ولا عايزينه يسيب الدين
ولا عايزينه يموت منتحر أو يموت شهيد رغيفين
ولا عايزينه يموت معتقل م الضرب ف الزنازين
أو يبوس الواوا ويطبطب ويرقص مع المجانين
لو ناوي صلاح يرجع يرجٌع معاه جيشه
أو يرجع للشباب همته ويرجع للشباب الدين
يمكن كلامي بيجرح يمكن أكون بجد حزين
علشان نصحي اللي نايم وننبه الغافلين
عايزين من ولادنا صلاح عايزين من بينهم ياسين
إن كان في غزة شهيد في مصر فيه ملايين
قولوا لليهود راجعين
Be a better friend, newshound, and know-it-all with Yahoo! Mobile.
ليست هناك تعليقات:
إرسال تعليق